कुमाऊंनी कविता- म्यर पहाड़ आज इतु ह्याव किलें हैगो?…..sumit joshi ‘writer’ poem

दाज्यू म्यर पहाड़ आज इतु, ह्याव किलें हैगो।
सफेद पोशों दिल आज ततु, काव किलें हैगो।।
युवा भविष्य आज अंधकार में,
भर्ती तैयारी करते -करते दिन न्हैगो धार में।
विकास पहाड़ों में इतु हैगो दगड़ियो,
हिटनबाटें रोड़ में आदिम,रोज घुरिना कच्यार में।।
नेताओं ज्वातों में धूल तक नि बैठि,
किलकें उन चलनी स्कार्पियो कार में।।
ठुल-ठुल कोठियों में आज, कालि कमाई झाव किलें हैगो।
दाज्यू म्यार पहाड़ आज ततु, ह्याव किलें हैगो।।
पहाड़ें प्राकृतिक वनस्पति आज, तस्करी में ल्हैं जना।
चोर मक्कारों गैंग जेल बे, बरी हबेर ल्हैं जना।।
करेंक्टर में लाल स्याहि वाल लें,
आज सचिवालय में हरी हबेर ल्हैं जना।
रिश्वतखोरी धंध देखो तुम दगड़ियो,
फौजें भर्ती में अहमद लें, कुवरी बनि बे ल्हैं जना।।
आखिर दगड़ियो हर भर्ती में अघिल,
च्यल….. भिन…… भतिज…साव….किलें..हैगो।
दाज्यू म्यर पहाड़ आज इतु ह्याव किलें हैगो।।
सरकार पर जनता विश्वास नि रैगे,
हर परीक्षा में आब पेपर लीक हुन भैगे।
बेशक छान बीन करनें एसटीएफ लें ल्हैगे,
लेकिन सीबीआई चांजें बात उठते ही…..
य… सरकार….चुपचाप….किलें….भैगे ?
अगर हर काम तुम, नियमों अनुसार करछा तो,
फिर सड़कों में ओवर पानी’क, ना’व किलें हैगो।
दाज्यू म्यर पहाड़ आज इतु ह्याव किलें हैगो।।
दगड़ियो आखिर तुम आपन,
अधिकारों लिजी कब लड़’ला?
कब तुम आखिर इन गद्दारों,
पछिल हाथ ध्वेबेर कब पड़’ला?
आज अगर जागरूक नि भया दगड़ियो….
अघिल जनम में लें तुम सिर्फ पश्चाताप कर’ला।।
सही बाटों कें भुलि’बे य सिस्टम,
गलत बाटों’हें आज ततु, छा’व किलें हैगो।
दाज्यू म्यर पहाड़ आज इतु ह्याव किलें हैगो।।
दाज्यू म्यर पहाड़ आज इतु ह्याव किलें हैगो ?
स्वरचित मौलिक
रचना – सुमित जोशी ‘राइटर’
ग्राम – नया संग्रौली (बस्टा)
पोस्ट ऑफिस – जैंती
जिला – अल्मोड़ा, उत्तराखण्ड़
पिन कोड – 263626
(sumit joshi ‘writer’ poem)
यह भी पढ़ें- कुमाऊंनी कविता- “पहाड़क हिसाब….” कविता कैड़ा (काव्य संकलन देवभूमि दर्शन)